पुणे : संगणकतज्ज्ञ, लेखक डॉ. दीपक शिकारपूर यांना ‘रोटरी इंटरनॅशनल’तर्फे देण्यात येणारा मानाचा ‘सर्व्हिसेस अबाव्ह सेल्फ’ हा पुरस्कार जाहीर झाला आहे. समाजासाठी निरपेक्ष भावनेने झोकून देऊन काम करणाऱ्या व्यक्तीला ‘रोटरी’तर्फे जागतिक पातळीवरील हा पुरस्कार देण्यात येतो. १९९१पासून हा पुरस्कार देण्यात येत आहे.
जगभरातील दोनशेपेक्षा अधिक देशांमधून या पुरस्कारासाठी अर्ज आले होते. अत्यंत कठीण निकष लावून त्यातून काही अर्ज निवडण्यात आले. त्यानंतर ‘रोटरी इंटरनॅशनल’च्या संचालक मंडळाने पुरस्कारार्थींची अंतिम यादी तयार केली. त्यामध्ये वर्ष २०१७-१८साठी पुण्यात डिजिटल साक्षरतेसाठी कार्य करणारे डॉ. दीपक शिकारपूर यांचे नाव निश्चित करण्यात आले. हा ‘रोटरी’तर्फे वैयक्तिक पातळीवर देण्यात येणारा सर्वांत मानाचा पुरस्कार असून, पुरस्कारार्थीला आंतरराष्ट्रीय प्रेसिडेंटनी स्वाक्षरी केलेले सन्मानपत्र देण्यात येते.
डॉ. दीपक शिकारपूर हे संगणकतज्ज्ञ असून, १९९५पासून व्याख्याने, लेख, पुस्तके, व्हिडिओ, मोफत करिअर मार्गदर्शन अशा विविध माध्यमांतून डिजिटल साक्षरतेसाठी काम करत आहेत. माहिती-तंत्रज्ञानाचा वापर सर्वसामान्य माणसाला दैनंदिन जीवनात कसा करता येईल, याचे मार्गदर्शन करणारी, तसेच या क्षेत्रातील अभ्यासक्रम, नवनवीन शोध, संशोधने याबाबत ते सातत्याने सहजसोप्या पद्धतीने मार्गदर्शन करत असतात. या विषयाच्या संदर्भात त्यांनी तब्बल ३८ पुस्तके लिहिली आहेत. त्यांच्या कार्याची दखल घेऊन केंद्र सरकारने माहिती तंत्रज्ञान शिक्षणाच्या प्रसाराकरिता कार्यरत असलेल्या ‘एआयसीटीई’च्या राष्ट्रीय माहिती तंत्रज्ञान मंडळाचे सदस्य म्हणून त्यांची नियुक्ती केली आहे.
डॉ. दीपक शिकारपूर यांची या आंतरराष्ट्रीय पातळीवरील मानाच्या पुरस्कारासाठी निवड झाल्याबद्दल सर्वच स्तरांतून त्यांचे कौतुक होत आहे.
(Please
click here to read this news in English.)
